زجل
مواقع
بقلم شريف شحاته مصر
الخلق كلها مشغولة بتويتر أوفى الفيس بوك
وحياة بهواتف محمولة ماسنجر أو التيك توك
بكلمة أو صورة منقولة أو فيديو يخليك بتشك
بثقافة بسيطة وبسهولة كمية كبيرة من العك
الفايدة قليلة ومحدودة مع ناس معدودة باليد
واحدة بتترقص كالدودة وقيمنا معاها بتتهد
وواحدة بتشتم ببرودة أمها وأبوها وبجد
وصعلوك بيهرج مع حودة تشوفهم نفسك تتسد
ونجوم بتمثل لقطات وكلامهم سيئ وبذيئ
كأنك تسمع خرافات من واحد صعلوك ورديئ
ومواقع فيها الإشاعات من مجرم وكأنه بريئ
وتمر دقايق وساعات ما تشوف غير كل قميئ
أغانى مليانة إسفاف مصحوبة بهز مع رقص
لو عينك أو عقلك شاف يتجنن قلبك من البص
ما تلاقى كلام أو أوصاف أو حتى شتيمة تترص
توصفهم بيها بإنصاف ويطير من عقلك كام فص
الناس موجوعة وغلابة عايزين حاجة بتفيد
دى برامج محتاجة رقابة سفاهة بتكتر وتزيد
فالحين في الزفة الكدابة والحق يوصل لحديد
وكأننا عايشين فى خرابة الهجس فيها بقى يزيد
