"يوم اليتيم.مش مجرد يوم"
كل سنة، أول جمعة من شهر إبريل بتبقى مختلفة، لأن الدنيا كلها بتفتكر الأطفال اللي مالهمش حد يسندهم.. الأطفال اللي الحياة حرمتهم من أعز حد في الدنيا، الأب أو الأم أو الاتنين مع بعض. اليوم ده اسمه "يوم اليتيم"، بس هو مش مجرد يوم بيتكتب في النتيجة ويتنسي تاني يوم، هو يوم بيقول لنا: "خدوا بالكم، في قلوب صغيرة محتاجة حضن، محتاجة ضحكة، محتاجة إحساس إنهم مش لوحدهم في الدنيا."
اليُتم مش مجرد إن حد يفقد والده أو والدته، اليُتم الحقيقي إن الطفل يحس إنه ملوش مكان، ملوش حد يسمعه، أو حتى حد يسأل عليه. وده دورنا إحنا.. دور كل واحد فينا إنه يبقى العوض، يبقى الفرحة اللي بتنور عيونهم، يبقى الابتسامة اللي تحسسهم بالأمان.
مش لازم تكون مليونير علشان تفرّح قلب يتيم، الابتسامة مش بفلوس، والاهتمام مش محتاج ميزانية. ممكن بهدية بسيطة، بكلمة طيبة، بحضن دافئ، تقدر تغيّر يومهم كله.. بل حياتهم كلها. الأطفال دول مش محتاجين شفقة، بالعكس، هم محتاجين حب حقيقي، محتاجين ناس تحس بيهم، ناس تعاملهم كأنهم جزء من حياتها، مش مجرد لحظة عابرة في يوم واحد في السنة.
"يوم اليتيم" مش بس يوم نزور فيه دار أيتام ونوزع حلويات وهدايا، هو تذكير لينا كلنا إن حوالينا قلوب محتاجة تتحب طول السنة، مش بس في يوم واحد. يمكن النهارده تفرّح قلب طفل، وبكره تلاقي الفرحة دي راجعة لك في وقت كنت محتاجها فيه.
الرحمة اللي بنزرعها في قلوب غيرنا، هترجع لنا في وقت إحنا محتاجين فيه رحمة ربنا. فخلونا نخلي "يوم اليتيم" بداية مش نهاية، بداية لحب واهتمام يستمر طول العمر.
نصرا ابراهيم
(أوبرا النوبة )
