الحكمة
أسامه عبد القادر أحمد
الناس أحجام
مش بالأجسام
والله برضه ولا بالعلام
طيب ماهو المتعلمين كتار
مخببش عليك ونا منهم
بس مين فيهم اللي معاه الحكمة ؟
اللي يقدر صاحبها بكلامه
ينورلنا الضلمة
مهما كانت الكهربا مقطوعة
لا دي الحكمة سكة تانية خالص
ربنا بيوهبها لبعض الناس
ناخد بالنا إنهم ناس في الأساس
يعني فيهم الأرضية المطلوبة في الحكماء
ماهماش ملايكة ولاهابطين من السماء
ناس مننا ساعة الحوجة بيروونا ارتواء
ومعاهم مينفعش تسأل :
هو الحكيم ده إيه الشهادة اللي معاه؟
ليسانس ولا ماجستير ولا دكتوراة ؟
لأنه معدي المسائل دي بمراحل
أستغفر الله
وكإنه نبي من الأنبياء
الحكيم عظيم بين القامات العظيمة
بياخد مكانته من أول رأي بيقوله
ومن أول مشورة يرد عليها
ومن رحمة ربنا بالناس
طبع قلوب وعقول بعض الناس
بطابع الحكمة
فيارب قربهم لينا
ولا تحرمنا من تواجدهم معانا
يارب ...
