قصيدتي بعنوان
ليه بتحاربنى
بتحاربنى ف قلبي ليه
وانا شغاله بالفاعل
برمم ف الشقوق جواه
وبعمل ف الوريد أنفاق
وادعمها بسهري الليل
عشان اقدر اعدى حدود
واروح عندك
وامد الجسر من نظرى
عشان تلمحني بعيونك
حبيبي عينى
وافرد ع الطريق شعري
تخطى عليه ظنون فكرى
وتوصلك
وتسكن جوه احلامك
وبتقولك
انا يا ادم الغنوه
وانا الماضي...وانا بكره
وانا الذكرى
وانا المهره
بسابق بجرى الريح
واندهلك
عشان اوصل لعنوانك
وبسمع نبض ايامك
بلاش تسكت
بلاش تهزمنى افكارك
وتغزل خيط العنكبوت
على خط شفايفى هناك
وبتراهن
على كل ليالى هواك
ال داب الحب فيها
جوه منك... جوه منى
ف احلا عذاب
وبتجهض حكايتي معاك
وكنت ليك
انا العاشقه.....انا الحالمه
بعمري معاك
ويبقى اخر كلامى ليك
عديم القلب وف طبعك
الهوى ملوش عنوان
كلماتي
حنان ابراهيم عبد القادر
