"الفشل اللي علمنا نمشي"

كل واحد فينا عنده حكاية.. حكاية موقف كسره، تجربة خذلته، خطوة خاف ياخدها بعد ما وقع قبلها.

وساعات بنحس إن الفشل ده نقطة سودة في حياتنا، نهاية طريق، أو علامة على إننا مش قدّ اللي كنا بنحلم بيه.

بس الحقيقة؟

الفشل مش نهاية.. الفشل بداية، بس إحنا اللي ساعات مش بنفهم الرسالة.

فيه ناس لما بتقع، بتقرر ماتقومش تاني.. بتخاف تجرب، بتشك في نفسها، وده طبيعي،

بس الأهم إننا مانفضلش قاعدين في الحتة دي كتير.

الفشل بيأثر علينا؟ أيوه.

بيوجع؟ أكيد.

بيخلينا نشوف نفسنا بنظرة مختلفة؟ ساعات كتير.

بس هو كمان بيدينا فرصة نفكر، نراجع، نرتّب أولوياتنا، ونشوف الغلط كان فين.

مين فينا ماخدش قرار غلط؟

مين فينا ماحبش حد طلع مش قده؟

مين فينا مااشتغلش شغلانة حاسس إنها سرقت منه روحه؟

كل ده فشل؟ آه.. بس كمان كل ده كان سكة عرفتنا إحنا مين، وبنحب إيه، ومانستحقش إيه.

الخروج من الفشل مش بييجي بيوم وليلة..

بيبقى مشوار، فيه لحظات شك، ولحظات حزن، ولحظات ندم.

بس أهم خطوة في المشوار ده، إنك تسامح نفسك.

آه، سامح نفسك إنك غلطت، وإنك اتسرعت، وإنك صدقت حد ماكانش قد الكلام.

سامحها وابدأ من تاني..

لأن طول ما انت عايش، لسه فيه فرص، ولسه فيه تجارب، ولسه فيه انتصار جاي بعد كل هزيمة.

في الآخر، التجارب الفاشلة ماكنتش نهاية، كانت درس.

وكل مرة وقعت فيها، كانت بتجهزك تقف أقوى.

فخلي عندك أمل..

وافتكر إنك مش أول حد يفشل، بس ممكن تبقى من القليلين اللي قاموا بعد ما وقعوا، وكملوا الطريق.

نصرا ابراهيم

(أوبرا النوبة)