زمن تاني

وسط أجندة قديمة خالص

صورة باهته لشخص عزيز

هتمققي عنيك في الملامح

هتعصري دماغك..معقول

وهتشهقي شهقة ندم

ويمكن ساعتها دمعة تفر

هتشدك الكسرة اللي في عنيه

ياما سبلتي قدامها

هتسرحي في متاهة الروح

وتفتحي صفحة البوح

هتدخلي اوضتك المرتبة جدا

وتمدي ايدك في ضلفة دولابك

ف شنطة بيضا قديمة خالص

صورة جانبية لاتنين عشاق

ووردة بلدي متحنطة

حافظة الأماكن والتاريخ

هتغمضي عنيكي وتسحبي نفس طويل

تشمي ريحة البراءة

وتسلمي روحك لمشرط الزمن 

هيفتح قلبك القاسي 

ويفرجك على واحدة كنت نسياها

يفتح الباب اللي راجع م الشغل

ينده عليك بصوت مرجوف

يهزك ..يشيل الشعر المنكوش من فوق حاجاتك اللي غرقانة وسط بحر من الدموع

هتقع عنيه على صورة اتنين عشاق

واحد ضيعه عنادك

وضحكة حلوة لبنت ميعرفهاش

محمود عبد الشافي