ااااااه يا مصر 🇪🇬

المستشار طارق مقلد

فيكي إيه يا مصر؟ 7000 سنة بتتسرق وبرضه بنحبك وعايشين في خيرك... فيكي إيه؟

فيكي حاجة مش مفهومة، حاجة تخلي القلب يوجع وهو لسه بيحب. كل ما نقول خلاص زهقنا، نتعب ونفكر نسيبك، نرجع نلاقيك ساكنة فينا... في كل تفصيلة. في الحارة اللي لعبنا فيها، في ضحكة أمنا، في ريحة الأكل اللي ملوش زي، في الأمان اللي بنحسه وإحنا بنمشي وسط الزحمة.

أنا شخصيًا كتير بكلم نفسي وأسأل: "إيه اللي مخلي قلبي متعلق بيكي كده؟" يمكن علشان أول ضحكة كانت في حضنك، أول فرحة، أول دمعة. يمكن علشان رغم كل حاجة، لسه فيكي طيبة الناس اللي بتسأل من غير مصلحة، وتدي من غير ما تستنى رد.

يا مصر، اتسرقتي كتير، من برا ومن جوا. اتاخد من حضارتك، من دهبك، من آثارك، من شبابك. بس ولا مرة اتاخد منك جمالك، ولا روحك. ولسه بنشوف فيكي العيد، الفرح، والأمل اللي بنتمسك بيه كل يوم وإحنا بنعدي من شوارعك.

أوقات بنغضب، بنشتكي، نحس إنك قاسية. بس بعد شوية، نهدى ونقول: "يمكن هي مضغوطة زينا، يمكن اللي فيها أكتر من اللي ظاهر". ووقتها، نرجع نحبك تاني، كأننا بنحب أمنا حتى وهي بتزعق.

فيكي إيه؟

فيكي ذكريات، فيكي ناس، فيكي حواديت بتحكي عننا.

فيكي ضهر مهما اتعبنا، عمره ما وقعنا.

فيكي حب مشروط... حبنا ليكي.

فيكي كل حاجة، بس أهمهم... إحنا.

المستشار طارق مقلد

عاشق لتراب مصر